Jom Heboh TV3 masuk kelinda dagang temuai

Perintah sedia nyelitka Karnival tebilang nya kena narit mayuh agi orang datai ke menua Sarawak

KUCHING: Perintah sedia deka nyelitka Karnival Jom Heboh dalam kelinda pengawa dagang menua tu, ku Kepala Ketua Menteri Pehin Sri Abdul Taib Mahmud.

Iya madah, karnival tu nyadi siti palan kena narit mayuh agi orang datai ngagai menua Sarawak kelebih agi ngagai bandar raya Kuching.

Taib madah Karnival Jom Heboh mega meri peluang ngagai orang dagang menua ngangkatka barang menua tu ke jual.

“Udah tentu karnival tu (Karnival Jom Heboh) deka dipasuk dalam kelinda pengawa dagang temuai.

“Peda aku makin mayuh macham program tiap taun bisi diatur ba karnival tu lalu tu pekara ke manah. Iya mega sama bela ngangkatka barang ke digaga menua tu empu dijual maya nya lalu tu deka meri peluang pengawa sereta nyungkak ekonomi orang dagang menua tu,” ku iya madah maya diintebiu TV3 udah iya nemuai ngagai palan Karnival Jom ba luar Stadium Negeri ditu kemari.

Berindik ari tu, Taib mega meri penemu iya ngasuh Palan Konvensyen Borneo Kuching (BCCK) nyadi palan baru karnival tu taun baru tu ila.

Iya madah, palan ke betikas entarabansa tu ke bisilima kilometer ari bandar raya tau dijadika alai baru ngatur pengawa tu laban iya bisi kapasiti ulih alai paking kerita ke besai kelimpah ari nyendiaka mayuh macham servis enggau perengka bukai.

“Enti karnival tu diatur ba BCCK, iya deka meri peluang ngagai orang mayuh ba serata nengeri tu ngagai sitak luar ari bandar raya,” ku iya.

Sebedau nya Taib mega beratika pengawa nyerah bantu kira RM20,000 ari Tabung TV3 Bersamamu ngagai nembiak ke meskin seranta ba menua tu.

Sama bisi nyempulang Kepala Menteri ngagai atur pengawa nya, Sapit Kepala Menteri Datuk Patinggi Tan Sri Alfred Jabu, Ketuai Pegawai Operasi Media Prima Bhd Datuk Amrin Awaluddin sereta Menjier Besai Kumpulan Hal Ehwal Korporat Media Prima Bhd Badariah Jalil.

Karnival tu ke udah bejalai ngagai serata menua ba Malaysia belabuh ari bulan Februari tu tadi, Karnival Jom Heboh 2009 neruska pejalai iya ngagai sitak kelima iya nya Sarawak.

Karnival tu ke udah masuk tujuh tahun tu nerima mayuh temuai ke datai ari serata sitak ba bandar raya datai ngagai luar Stadium Negeri, Petra Jaya ditu laban deka betemu sereta bekelala enggau bala personaliti sereta artis ke sama bisi sereta sepemanjai karnival tu.

Mayuh macham pengawa sereta program ke manah udah dirintaika sepemanjai dua hari karnival tu kelebih agi kena sida anak mit, entara program ke bisi dibantaika baka pengawa Mini Explorace Kids sereta nyambut hari pengada mega bisi diatur ba kedai TV3 Kids.

Kelimpah ari nya, mayuh macham pengawa sereta perengka kena bemain bisi diatur kedai mit-mit Aksi, TV3 Insipirasi Wanita, Kota Ilmu enggau MyTV3.

Program ke dianti bala mayuh ba palan tu tauka ba rumah iya nya Konsert Jom Heboh ke deka ditaburka ‘langsung’ saritu belabuh ari pukul 9.00 malam ngagai 10.30 malam.

Entara sida artis ke tebilang ke deka merindang orang mayuh malam tu baka Adibah Noor, One Nation Emcees, Adam, Hujan enggau Dina.

From MySarawak.org

Thanks to agent24,natezz for the pictures